USPTO објавува ново правило за трговски марки, со кое се бара апликантите и регистрираните лица од дома и странство да имаат застапник кој е овластен за постапување пред Американскиот Патентен Завод

Барањето се однесува на сите апликанти за трговски марки, застапници и странки чиј постојан законски престој или главно место на работа се надвор од САД.

Со ова, сите подносители, сопственици и странки во овие постапки се обврзуваат да имаат застапник овластен за вршење дејност од САД, кој ќе ги застапува пред USPTO во сите постапки поврзани со трговските марки.

Дополнително, застаниците овластени од САД, кои застапуваат клиенти пред USPTO во врска со прашањата за трговски марки, се обврзани да потврдат дека се активни членови, со активен статус на нивната лиценца, и да приложат  информациите за нивната лиценца.

Ова ново правило ќе стапи на сила од 3 август 2019 година.

Со ова се укинува праксата на Американскиот завод да дозволи постапување од страна на самите подносители односно носители на регистрации во оваа земја или странски застапници иако истите немаат домицилен статус во оваа држава.

Целосното известување можете да го прочитате на следниот линк …..

Церемонијата на врачувањето на наградите, која повеќе наликува на церемонијата на доделување оскари, на шпанската жена пронаоѓач Маргарита Фалгарес и донесе две награди, а Сите останати награди заминаа глобално, од Јапонија до Австралија.

Годинава церемонијата се одржа во Виена, каде беа наградени иноватори од повеќе области, од иновации во областа на медицината и екологијата до креатори на литиумски батерии.

Тие освен што се пронаоѓачи, исто така се и сопственици на своите интелектуални творби.

Процесот на патентирање на интелектуалната сопственост е исклучително важен за развојот, како на конкретна земја така и на цела Европа и светот, што крајно води до развој на целото, глобално, општество. Европа, во тој поглед  ја има една од најсилните организации за интелектуална сопственост претставена во лицето на Европската патентна организација ( анг. EPO).

При процесот на регистрација на одреден патент, пријавениот пронајдок се проверува во базата на податоци на EPO, која содржи 1,2 милијарди записи, а потоа секоја идеја се разгледува од тричлено жири.

Колку е детален тој процес, покажува и фактот што на трите најголеми по број на патенти компании во системот на ЕПО, Siemens, Huawei и Samsung добиле зелено светло за едвај половината од предложените патенти.

Ваквите настани се исклучително важни, затоа што ги покажуваат најпродуктивните умови на планетата, каков што е случајот со јапонецот Акиро Јошино, овогодинешниот носител на наградата за иноватори од земји надвор од ЕПO.

Јошино е инвенторот на литиумската батерија и нејзиниот развој, елементот кој е клучен за работата на сите паметни телефони и многу други електронски уреди. На доделувањето на наградите, 71 годишнот Јошино изјави дека сака да е жив доволно долго за да ја види примената на литиумската батерија и во автомобилите, исто толку масовно колку и при паметните телефони.

„Интелектуалната сопственост е 85-90% од цената на еден стартап. Кога разгледуваме можности за инвестирае во нeкој стартап, всушност ја проценуваме вредноста на интелектуалната сопственост“, рече Ингрид Спилма, советник на фондови за ризичен капитал, за време на една од сесиите во Виена.

Томас Рајнер, пак, потпретседател на компанијата за сензори AMS додава дека бројот на патенти е посебно важна метрика за инвеститори и бинис партнери.

„Повеќето стартапи не ја знаат вистинската вредност на доброто патентно портфолио“, изјави тој во Виена.

Наградите:

Во категоријата индустрија, за патентирањето на нов начин на рециклирање на пластика и преработка на рециклираниот материјал во висококвалитетни нови производи, наградата ја понесоа Клаус Фајхтингер и Манфред Хекл од Австрија. Нивните машини обработуваат 14,5милиони тони пластика годишно.

Во категоријата истражување, наградата ја понесе Жером Галон од Франција, создавачот на инструментот за прецизно дијагностицирање на рак, immunoscore. Инструментот користи дигитални снимки и софтвер за проценка на можноста за повторување на ракот.

Наградата во категоријата мали и средни претпријатија отиде во рацете на Рик Бројр од Холандија, создавач на заштитен слој за бродови, која штити од подводни наслаги и ја намалува потрошувачката на гориво.

Категоријата „Земји надвор од ЕПO“, ја пополни креаторот на литиумската батерија, јапонецот Акура Јошино, чија иновација денес се користи во пет милијарди уреди, од паметни телефони до лаптопи и автомобили.

Наградата од публиката и за целокупен придонес ја понесе Маргарита Салас Фалгерас  од Шпанија, чијашто иновација возможува побрзо, поедноставно и посигурно детектирање на траги од  ДНК, доволно големи за истражување. Нејзините иновации се користат во онкологијата, криминалистиката, археологијата и други сфери.

Потегот на Гугл значи дека смартофините на Хуавеи нема да имаат пристап до многу популарни апликации. Хуавеи е под притисок поради обвинувања за наводни врски со властите во Пекинг.

Американскиот технолошки гигант Гугл соопшти дека му ја повлекува лиценцата на Хуавеи за користење на Андроид оперативниот систем за мобили телефони. Доколку до такво нешто дојде, кинеската компанија ќе мора да ја користи софтверската верзија на системот со отворен код.

Новите смартфони на Хуавеи веќе нема да имаат пристап до услуги како што се Џимејл, мапи и Јутјуб, како и безбедносните ажирирања (апдејт).

Сепак, луѓето кои веќе поседуваат Хуавеи телефони ќе можат да ги користат и ажурираат апликациите кои веќе ги презеле.

Минатата недела американскиот претседател Доналд Трамп потпиша одлука со која на американските компании им се забранува да ја користат телекомуникациската опрема која ја направиле „странски противници“, односно фирми за кои се смета дека претставуваат ризик за американската национална безбедност. Со тоа Трамп практично ја стави на црна листа кинеската компанија Хуавеи, ускратувајќи ѝ го пристапот до американскиот пазар и истовремено ограничувајќи ги можностите за продажба на американски компании.  ...повеќе

Советот на ЕПИ, 86ти по ред се одржа на 10 и 11 мај  2019 во Софија, Бугарија. Учествуваа околу 200 претставници од вкупно 12.000 европски патентни застапници, меѓу нив и проф. д-р Ѓорѓи Филипов, основач на Берин и директор на Берин Интернационал (Виена, АТ) и дипл. инж. Ванчо Дамјански, извршен директор на Берин (Скопје, МК), како двајца од вкупнио четворицата претставници од МК). На Семинарот којшто претходеше на работата на Советот, учествуваа и колешкате, м-р Ивона Секуловска, правник од Агенцијата Берин и дипл. инж. и ЕПЗ, Лилјана Филипова, соосновач. Дамјански учествуваше и во работата на годинашнава средба на Дисциплинската комисија на ЕПИ, како претставник на МК. Дисциплинската комисија, како и Советот го разгледаа и усвоија предлогот за висина на таксата (120 Евра) за издавање сертификат дека не се води  дисциплинска постапка против одреден европски патентен застапник.  На Семинарот се разгледуваше и темата на постоење на „инвентивен чекор”, како еден од главните три услови за патентирање на одреден пронајдок. Беа поднесени и усвоени извештаи претседателот и потпретседателите на ЕПИ, на генералниот секретар, на внатрешните ревизори, на финансискиот комитет, на чуварот на трезорот и на останатите комитети, меѓу кои и на Комитетот за европска патентна пракса, кедешто беше приложен и извештајот на Богољуб Илиевски , ЕПИ, потпретседател на Комитетот. Беше уссвоена и одлука за воведување позиција на „Главен извршен директор” на Европскиот патентен институт. Дебатите продолжија на заедничката вечера на учесниците, проследена со фолклорни песни и танцови на изведувачи од Бугарија, при што беа изведени и танцувани и неколку македонски народни песни и ора. Софија беше прекрасен домаќин, а претставниците од Берин не ја пропуштија можноста да ги зацврстат старите пријателства и деловни врски и да отворат нови. За првпат бевме претставници од Северна Македонија, но со МК код.

Приложуваме и неколку снимки со нашите пријатели од Грција и Кипар, со кои, и досега добро соработувавме, но отсега ниту тие не се двоумеа  тоа јавно да го манифестираат.

Благодарност до организаторите, претставувани од претседателот Францис Лајдер, ЕПЗ и домаќините , бугарската група на ЕПИ. 

Во рамките на едукативната програма на Европскиот Патентен Завод (EPO) и Европската Патенкна Академија излезе публикацијата која ги претставува условите за присилно лиценцирање во сите законодавства кои се дел од Европската Патентна Организација. 

Колегата Богољуб Илиевски, заменик директот и раководител на одделот за патенти на Берин доо, како претставник од Северна Македонија партиципираше во главата која се однесува на нашето законодавство.

Во определени случаи, националните органи може да дозволат освен сопственикот на патентот, првата да ги користат и други компании или физички лица без согласност на неговиот сопственик. "Присилно лиценцирање во Европа" обезбедува преглед на режимот на задолжително лиценцирање во сите 38 земји-членки на Европската патентна организација, вклучувајќи ги можните основи за издавање, предвидените постапки и судската пракса.

Особена чест и исклучителна професионална сатисфакција беше можноста да се соработува во креирање на оваа публикација издадена во склоп на Европската Патентна Академија која го претставува едукативниот дел на европската патентна организација.

Повеќе на следниот линк: https://www.epo.org/learning-events/materials/compulsory-licensing-in-europe.html

Дипл. инж. Ванчо Дамјански, европски и македонски патентен застапник, извршен директор на Агенцијата за интелектуална сопственост „Берин” и дипл. инж. Богољуб Илиевски, европски и македонски патентен застапник и шеф на Одделот за патенти, учествуваа на Европската конференција и на Саемот на услуги од областа на индустриската сопственост “IP SERVICE WORLD 2018” (26-27.11.2018), кои по 9ти пат се одржаа во Минхен, седиште на Европската патентна организација и на Германскиот завод за патенти и марки. Претставниците на Берин присуствуваа на 60 предавања, панели и тркалезни маси. Тие имаа прилика да ги слушнат и да се сретнат со Steve Gong (Google), Belinda Gascoyne (IBM), Michael Gollwitzer (Siemens), B.Josuhn-Kadner (General Electric), Markus Bedenbecker (BMW), Benjamin Paul (Osram) и со многу други корисници на услуги и еминентни експерти од областа на индустриската сопственост. На конференцијата учествуваа 550 патентни застапници, кои разменуваа искуства на теми од индустриската сопственост и поврзаноста со иновациите, индустриските трендови, софтверски решенија, блокчејн, вештачката интелигенција и менаџментот на интелектуалната сопственост. На Саемот за услуги во индустриска сопственост своите капацитети ги претставија 75 изложувачи од 55 земји од светот. „Берин” настапи на самостоен штанд, преку презентации и разговори запознавајќи ги посетителите на саемот и учесниците на конференцијата со услугите што ги пружа во областа на патентите, трговските марки и индустрискиот дизајн. Дамјански и Илиевски реализираа десетина средби со претставници на повеќе компании корисници, но и со провајдери на услуги во областа на индустриската сопственост. Особена чест на Берин му направи директорот на Google, одговорен за патенти, Стив Гонг, кој го посети штандот на компанијата и се задржа на ручек и разговор за предизвиците што ја очекуваат интелектуалната сопственост во блиска иднина. Агенцијата Берин беше единствен претставник на саемот од регионот на Југоисточна Европа.